हिमलुङ हिमपहिरो : खोज तथा उद्धारका लागि पर्वतारोहीको टोली आधार शिविरमा

काठमाडौं, असोज १२। मनाङको नार्पाभूमि गाउँपालिका–५ स्थित ७ हजार १२६ मिटर अग्लो हिमलुङ हिमालको आधार शिविरमा हिमपहिरोमा परी सम्पर्कविहीन भएका आरोही तथा सहयोगीको खोजीका लागि उद्धार टोली परिचालन भएको छ।
नेपाल राष्ट्रिय पर्वतीय गाइड संघका अनुसार आठ सदस्यीय खोज तथा उद्धार टोली सोमबार बिहान हिमलुङ आधार शिविर पुगेको छ। टोलीले हिमपहिरो गएको क्षेत्रमा खोजी तथा उद्धारको काम अघि बढाउँदैछ।
उद्धार टोलीमा अन्तर्राष्ट्रिय पर्वतीय गाइड (आईएफएमजीए) मिङ्मा जी. शेर्पा, पासाङ काजी शेर्पा, पिम्बा तेन्जिङ भोटे, आशिष गुरुङ, तेर्सिङ पेम्बा शेर्पा, विक्रम कार्की, दान्दु शेर्पा र पासाङ रिन्जी शेर्पा छन्।
यसअघि आइतबार बिहान हिमलुङ आधार शिविरमा हिमपहिरो खस्दा आरोहण टोलीका सदस्य तथा सहयोगीहरू प्रभावित भएका थिए। घटनामा सुरुमा १४ जना सम्पर्कविहीन भएको विवरण आएको थियो। आइतबार दुई जनाको शव फेला परेको थियो भने सोमबार थप दुई जनाको शव भेटिएपछि मृतकको संख्या चार पुगेको छ। चारै जनाको पहिचानसमेत भएको छ।
पछिल्लो विवरणअनुसार हिमपहिरोमा परी अझै १२ जना सम्पर्कविहीन छन्। उनीहरूको खोजीका लागि पर्वतीय गाइडसहितको टोली आधार शिविर पुगेको हो। उद्धारमा मौसम तथा हिमाली क्षेत्रमा रहेको कठिन भौगोलिक अवस्थाले चुनौती थपेको छ।
हिमलुङ हिमाल मनाङको दुर्गम नारफु क्षेत्रमा पर्छ। आधार शिविर फु गाउँबाट पैदल पुग्नुपर्ने क्षेत्रमा रहेको छ। घटनाका बेला हिमाली क्षेत्रमा निरन्तर वर्षा तथा हिमपात भइरहेको थियो। यसै कारण हिमपहिरोको जोखिम बढेको र उद्धार कार्यसमेत प्रभावित भएको बताइएको छ।
हिमपहिरोमा परेकाहरू विदेशी आरोहीका लागि आधार शिविर तथा आरोहण मार्ग तयारीमा खटिएका नेपाली गाइड र सहयोगीहरू रहेको विवरण सार्वजनिक भएको छ। उनीहरू हिमालमा आरोहण टोलीका लागि आधार शिविर तयार गर्ने तथा आरोहण मार्गमा आवश्यक काम गर्ने क्रममा त्यहाँ पुगेका थिए।
नेपाल राष्ट्रिय पर्वतीय गाइड संघले खोज तथा उद्धारमा खटिएको टोलीले हिमलुङ आधार शिविरबाट सम्पर्कविहीनहरूको खोजीलाई प्राथमिकताका साथ अघि बढाइरहेको जनाएको छ। संघले घटनाबाट प्रभावित आरोही, उनीहरूका परिवार तथा उद्धारमा खटिएको टोलीप्रति सहानुभूति व्यक्त गर्दै सहयोग र प्रार्थनाका लागि आग्रह गरेको छ।